Китоб- равшангари дилҳо

Душанбе, 12.02.2014. (АМИТ «Ховар», Зарангези Латиф).- Рӯзҳои 27-ум- 28 –уми феврали соли ҷорӣ дар Китобхонаи давлатии бачагонаи ҷумҳуриявии ба номи Мирсаид Миршакар семинари ҷумҳуриявӣ  таҳти унвони «Китоб- равшангари дилҳо» доир мегардад.
Семинари мазкур ба баргузории «Ҳафтаи китоби кӯдакон ва наврасон» бахшида шуда, дар он тамоми директорони китобхонаҳои вилоятӣ , мутахассисон оид ба китобҳо , шуъбаҳои маорифи шаҳру ноҳияҳо , китобдорони мактабҳои таҳсилоти ҳамагонӣ ширкат меварзанд.
Ба иттилои Қурбоналӣ Афғонов, директори Китобхонаи давлатии бачагонаи ҷумҳуриявии ба номи Мирсаид Миршакар дар назар аст дар ин семинар ҳамчунин вазири фарҳанги ҷумҳурӣ Шамсуддин Орумбеков, раиси Бунёди адибони Иттифоқи нависандагони Тоҷикистон Маҷид Салим ва дигар шахсони алоқаманд иштирок намоянд.