Пирӯзии итолиёиҳо ҷиҳати сохтмони «Аквапарк»-и Душанбе

 
Душанбе, 13.02.2014.(АМИТ «Ховар», Марзия Саидзода).- Интизор меравад, ки дар оянда сохтмони нотамоми  «Аквапарк»-и Душанберо ширкати итолиёвии «Preston & Barbieri», ки ғолиби озмуни байналмилалии эълоннамудаи шаҳрдории Душанбе оид ба дарёфти интихоби беҳтарин лоиҳа ва пудратчии асосии иншооти мазкур гардидааст, ба анҷом расонад. Дар ин росто дар Душанбе мулоқоти Маҳмадсаид Убайдуллоев -шаҳрдори Душанбе бо Франческо Феррарӣ -ноиби президенти ширкати итолиёвии «Preston & Barbieri» баргузор гардид. Дар мулоқот раиси шаҳр изҳори боварӣ намуд, ки идомаи сохтмони иншооти нотамоми «Аквапарк» дар муҳлати муқарраргардида бо сифати баланд ва дар асоси меъёрҳои байналмилалӣ ҷараён хоҳад гирифт.
   Зимни мулоқот ҳамзамон масоили тавсеаи ҳамкории шаҳрдории Душанбе бо ин ширкати итолиёвӣ дар мавриди таҷҳизонидани боғҳои фарҳангу фароғатии пойтахт аз зарфият ва имконоти ширкати мазкур матраҳ гардид.