Сорбон иттилооти компютериро рахна кард

Душанбе, 17.02.2014. (АМИТ «Ховар», Лутфия Эшонзода).-Аз ҷониби кормандони Раёсати мубориза бар зидди ҷиноятҳои муташаккили ВКД ҳангоми гузаронидани чорабиниҳои фаврӣ-ҷустуҷӯӣ сокини шаҳри Душанбе Сорбон Имомназаров, соли таваллудаш 1984, ҳамчун гумонбар дар ғайриқонунӣ даромадан ба иттилооти компютерӣ дастгир шуд.
Тавре ки сомонаи расмии Вазорати корҳои дохилии ҶТ хабар медиҳад,  номбурда аввалҳои моҳи апрели соли 2013 дар назди бинои «Фарҳанг»-и шаҳри Душанбе бо шаҳрванди Федератсияи Русия Александр Прокопенко, соли таваллудаш 1987 вохӯрда, ҳар ду бо маслиҳати пешакӣ, ғайриқонунӣ ба иттилооти компютерӣ ворид гардидаанд. Онҳо таҷҳизоти техникӣ- ду адад «Шлюз-GSM» бо истифода аз интернети босуръати оптика дар интернетҳои шаҳри Душанбе, шаш адад «Шлюз-GSM», се адад «WIMAX», панҷ адад «Симбонк» — симкортҳои ширкати мобилии «Вавилон М»-ро таҷҳизонида, бо истифода аз барномаҳои махсуси компютерӣ, ғайриқонунӣ ба системаи муҳофизатшаванда даромада, бо терминатсияи ғайриқонунии зангҳои воридотии байналмилалӣ машғул гардида, дар натиҷа ба ширкати мазкур ва буҷаи давлат зарари моддӣ расонидаанд. 
Далелҳои шайъӣ гирифта шуда, нисбат ба ҳодисаи мазкур корҳои тафтишотӣ идома доранд.