«Амонатбонк» ободии шаҳрро хоҳон аст

 Душанбе, 3.03.2014. (АМИТ «Ховар», Лайло Тоирӣ).- Бо оғози фасли баҳор дар тамоми ҷумҳурӣ рӯзҳои шанбегӣ ва ҳашарҳои умумиҷумҳуриявӣ гузаронида мешаванд. Рӯзи 1 март кормандони тамоми  корхонаву кумитаҳои мамлакат шанбегӣ гузарониданд. Кормандони  Раёсати Бонки давлатии амонатгузории Ҷумҳурии Тоҷкистон  «Амонатбонк» низ барои саҳмгузор будан дар ободонии шаҳр бахшида ба ҷашни байналмилалии Наврӯз ва омодагиҳо ба 90-солагии пойтахт дар атрофи бинои Раёсати бонк ва «Боғи 50-солагии ҷавонон» ҳашар гузарониданд.
 Роҳбарияти Раёсати БДА ҶТ «Амонатбонк» тасмим гирифтааст ҳар ҳафта рӯзҳои шанбе бо иштироки кормандон барои саҳмгузор будан дар ободии шаҳр ҳашар эълон намояд.
Тавре  ки аз хадамоти матбуоти «Амонатбонк» хабар доданд, дар робита ба ин раиси раёсат Ҷамшед Норинов ҳамаи воҳидҳои сохтории раёсати бонкро вазифадор намуд, ки   барои нақши муассир гузоштан дар ободии шаҳр саҳмгузор бошанд. Ҳамчунин ҳамаи филиалҳои бонк дар шаҳри Душанбе низ муваззаф шуданд, то рӯзҳои шанбе ҳашарҳо гузаронанд.