Муҳоҷирони меҳнатӣ : роҳ ба сӯи Русия

Душанбе, 3.03.2014. (АМИТ «Ховар», Лайло Тоирӣ).- Субъектҳои хоҷагидор дар самти сафарбаркунӣ ва бокортаъминкунии муҳоҷирони меҳнатӣ дар давоми моҳи феврал дар миқёси вилояти Суғд корҳои назаррасро ба сомон расониданд. 
Аз ҷумла, дар ин давра соҳибкори инфиродӣ Маҳмудов 34 нафарро бо роҳи мусофиркашонии байналмилалӣ ба Федератсияи Русия фиристод. Тавре ки роҳбари гурӯҳ Одил Эралиев иттилоъ дод, ҳамаи онҳо сокинони ноҳияи Ашт буданд. Инчунин дар ин давра СИ «Маҳмудов» таҳти сарварии Озодбек Қуйсинмуродов 39 нафар сокини ноҳияи Мастчоҳро барои муҳоҷирати меҳнатӣ ба Федератсияи Русия сафарбар намуд. Ба  гуфтаи роҳбаладон барои сафари бехатари муҳоҷирон  ҳамаи шароитҳо фароҳам оварда шудаанд. 
Инчунин моҳи феврал Ҷамъияти дорои масъулияти махдуди «Сомонэкспрестранс» сафари 22 нафар муҳоҷирони меҳнатиро ба шаҳри Тюмен ташкил намуд. Аз ҷониби ҶДММ «Роҳи Абрешим» низ сафарбаркунии 13 нафар муҳоҷири меҳнатӣ ба шаҳри Тюмен ба роҳ монда шуд. Аз рӯи нақша муҳоҷирон 1 сол дар қаламрави Федератсияи Русия фаъолияти корӣ мебаранд.
 Пеш аз гусели муҳоҷирони меҳнатӣ кормандони Раёсат бо муҳоҷирони меҳнатӣ вохӯрда, оид ба муҳоҷирати бехатар бо онҳо суҳбатҳо намуданд.