Рушди устувори робитаҳои Фаронса ва Тоҷикистон

Душанбе, 03.03.2014. (АМИТ «Ховар», Кристина  Эрлих).- Чанде  пеш раиси  Палатаи  савдо  ва  саноати  ҶТ  Шариф  Саид  бо Сафири  Фаронса дар  Тоҷикистон  Дидиер Лера  мулоқот  намуд. 
 
Тавре  ки  аз  ПСС  ҶТ   ба  АМИТ «Ховар»  хабар  доданд,   зимни  мулоқот  вазъу  дурнамои  ҳамкории  дуҷонибаи мутақобилан  муфиди  тиҷоратию  иқтисодии  байни  Тоҷикистону  Фаронса  мавриди  муҳокима  қарор  гирифтанд. 
 
Раиси  ПСС ҶТ  зимни  суханрониаш  рушди   муттасили  ҳамкории  ҳар  ду  кишварро   зикр  карда,  ҳамзамон  иброз  дошт, ки   барои густариши  ҳамкории  иқтисодии  ҳар  ду  кишвар   имкониятҳои  зиёде  мавҷуданд.  Шариф  Саид   аз   имкониятҳои  ҷалби  технологияҳои  муосир  ба  Тоҷикистон  ва  бунёди   коргоҳҳои  дорусозӣ  бо  истифода  аз  гиёҳҳои  шифобахш,  атторӣ  ва маҳсулоти  ороишӣ,  ҳамкорӣ  дар  соҳаи  сайёҳӣ ва кӯҳнавардӣ  нақл  кард.
 
Дипломати  Фаронса  рушди  муносибатҳои  дуҷонибаи байни  Тоҷикистону  Фаронсаро  ба  дараҷаи баланд  арзёбӣ  карда,   зикр  намуд, ки  ҷониби  Фаронса  омодааст, ки  бо Тоҷикистон  дар  ҳамаи  самтҳо,  аз ҷумла   дар  бахшҳои  энергетика,  кишоварзӣ,  сайёҳӣ,  фарҳанг,  тандурустӣ  ва  маориф   ҳамкорӣ  намояд.