Мушкилии банкомат бартараф гардид

Душанбе, 10.04.2014. (АМИТ «Ховар», Лайло Тоирӣ).- Тавре ки қаблан иттилоъ додем, Бонки миллии Тоҷикистон бо мақсади таҳлили ҳамаҷониба ва ҳалли фаврии мушкилот дар хизматрасониҳои гуногуни бонкӣ хадамоти телефони бовариро ифтитоҳ намудааст. 
Муштариёни бонк акнун  имкон пайдо намуданд, ки  ҳангоми  дучор шудан ба камбудию нуқсон дар хизматрасониҳои бонкӣ ба рақами  +(992) 44- 600-15-20 занг зада, мутахассисони соҳаро огоҳ намоянд.  
Бояд гуфт, ки  ҳафтаи гузашта ба телефони боварӣ аз ҷониби шаҳрванди Душанбе оид ба фаъол набудани  банкомат, воқеъ дар бинои мағозаи тиҷоратии “Аврупо” муроҷиат шуда буд. 
Кормандони масъули бонки хизматгузор камбудиҳои ҷойдоштаро бартараф намуданд ва  ҳамон рӯз банкомат ба кор шурӯъ кард. 
Хотиррасон мекунем, ки телефони боварӣ рӯзҳои корӣ аз соати 8-00 то 17-00 фаъолият мекунад.