Полки комендантӣ 21- сола шуд

Душанбе, 14.04.2014. (АМИТ «Ховар», Лайло Тоирӣ).- Дар маросими тантанавӣ бахшида ба  муносибати 21-умин солгарди Полки комендантии Вазорати мудофиа ҳайатҳои фармондеҳии ин ниҳоди қудратӣ ва афсарону сарбозон, ки дар айни замон дар ҷузъу томҳои он фаъолияти хизматӣ доранд, иштирок намуданд.
Масъулини Ситоди генералии Қувваҳои мусаллаҳ таъкид доштанд, ки Полки комендантии Вазорати мудофиа аз рӯзҳои нахустини фаъолияти хеш дар баробари омодагии ҷангӣ, инчунин баҳри ҳифзу нигоҳдории иншоотҳои махсусан муҳими давлатӣ нақши муассир дорад. Дар  чорабинӣ зикр  шуд, ки самти фаъолият ва хизмат дар Полки комендантӣ аз дигар ҷузъу томҳои Артиши миллӣ то андозае фарқ мекунад. Аз ин рӯ, бо назардошти талаботи хосси хизмат дар ин шохаи артиш ҳамасола ба ин воҳиди низомӣ ҷавонони дорои савия ва  дониши хуб, аз ҷиҳати ҷисмониву рӯҳӣ обутобёфта ва дорои қади на камтар аз 170 сантиметр ҷалб мешаванд.
Бино ба иттилои дафтари матбуоти Вазорати мудофиа, дар ин рӯз бо фармони Вазири мудофиаи кишвар барои фаъолияти хуб ба як гурӯҳ афсарону сарбозони Полки комендантӣ раҳматнома, ифтихорнома, туҳфаҳои қиматнок ва рутбаҳои ҳарбӣ супорида шуд, ки ин таваҷҷуҳ ва қадршиносӣ нисбат ба заҳматҳои шабонарӯзии хизматчиёни ҳарбии ин қисми низомӣ мебошад.