Ҳадаф-танзими тиҷорат

Душанбе, 17.06.2014.(АМИТ «Ховар»,Фарзона Достонзода).-  Иҷрои Созишномаи Созмони тиҷорати ҷаҳонӣ (СТҶ) доир ба мусоидат ба тиҷорат мавзӯи давраи миллии омӯзишии дурӯзае мебошад, ки имрӯз, 17-уми июн дар шаҳри Душанбе оғоз шуд. 
Тавре ки ба АМИТ «Ховар» аз Маркази тиҷорати байналмилалӣ иттилоъ доданд,  давраи омӯзишӣ аз ҷониби Маркази тиҷорати байналмилалӣ (МТБ) дар чаҳорчӯбаи лоиҳаи МТБ ҷиҳати баланд бардоштани сатҳи огаҳии ниҳодҳои давлатӣ ва бахши хусусии Тоҷикистон доир ба имкониятҳо ва чолишҳои узвияти кишвар дар Созмони тиҷорати ҷаҳонӣ  оғоз гардида, аз 37 чора иборат аст.
Доктор Муҳаммад Саид, мушовири аршади МТБ доир ба мусоидат ба тиҷорат, созишномаи мазкурро чунин шарҳ медиҳад: «Созишномаи мусоидат ба тиҷорат аъзои СТҶ-ро муваззаф мекунад, то равандҳои гумрукиро беҳтар кунанд, шаффофият ва муассириятро боло бибаранд ва ҳамчунин ҳамкориро миёни ниҳодҳои фаъол дар марз ва бахши хусусӣ ба роҳ монанд». 
Созмони тиҷорати ҷаҳонӣ (СТҶ) ниҳоди байналмилалиест, ки дар соли 1995 бо ҳадафи танзими тиҷорат миёни аъзояш таъсис ёфтааст. Фаъолияти СТҶ  асосан ба бунёди фазои боз, озод ва одилонаи тиҷоратӣ равона шудааст, фазое, ки ҳама аъзо дастрасии баробар ба манфиатҳоро доранд. Ҷумҳурии Тоҷикистон 2-юми марти соли 2013 ба ҳайси узви 159-уми ин созмон пазируфта шуд.