Хатнасури дастаҷамъии 100 кӯдак дар Фархор

Фархор, 12.06.2014. (АМИТ «Ховар», Сулаймони Хол). Дирӯз дар ноҳияи Фархор аз ҷониби шуъбаи маориф фестивали кӯдакону наврасон таҳти унвони «Кӯдакон меваи боғи истиқлолиятанд» бо ҷалби беш аз 1000 тамошобин гузаронида шуд. Тавре мудири шуъбаи маорифи ноҳия Ғазалшо Сафаров иброз дошт, дар фестивал бештар кӯдакон аз синфҳои ибтидоӣ ширкат варзида, табъи ҳозиринро бо қироати шеър ва достонҳо болида гардониданд . Инчунин дар ин рӯз аз ҷониби соҳибкорон ва раисони чамоатҳо туйи хатнасури 100 нафар кӯдакон гузаронида шуд, ки бештари онҳо ба оилаҳои камбизоат мансубият доштанд. Дар ҷараёни фестивал 12 нафар кӯдакони дар соли хониш беҳтарин ба шумор рафт, бо нишонаи сарисинагии «Соҳибватан» сарфароз гардонида шуданд. Хонандагони синфҳои болоие, ки дар олимпияда ва озмунҳои ноҳиявӣ, вилоятӣ ва ҷумҳуриявӣ иштирок карда, ҷойҳои муайянро ишғол намуданд аз ҷониби шуъбаи маориф бо ифтихорномаҳо қадр шуданд. Мавриди ёдоварист, ки дар ин рӯз сохтмони муассисаи томактабии №4 ба номи Спитамен дар деҳаи Марғзори ҷамоати деҳоти Ғалаба ба итмом расида, ба истифода дода шуд.