Мавсими лагерҳои тобистона оғоз меёбад

Душанбе, 06.06.2014. (АМИТ «Ховар», Фарзона  Достонзода). —  Тибқи  дурнамо  аз  12  июн дар Тоҷикистон  лагерҳои  тобистонаи  кӯдакону  наврасон  ба  кор  шурӯъ  мекунанд.
Тавре  ки  мудири  шуъбаи  фарҳанг,  кори байни омма  ва  сиёсати  бахши  ҷавонони  Федератсияи  иттифоқҳои   касабаи Тоҷикистон Саъдӣ  Машидов ба  АМИТ «Ховар»  хабар  дод,   дар  асоси Қарори Ҳукумати  Ҷумҳурии  Тоҷикистон дар  назди Федератсияи иттифоқҳои  касабаи мустақили  Тоҷикистон  ситоди «Тобистон – 2014» таъсис  ёфтааст, ки ба  он  роҳбарони кумитаҳои соҳавии  ҷумҳуриявӣ ва кормандони  масъули Федератсия  шомиланд. Ситоди  мазкур  барои  омодагирӣ ба  истироҳати  мактабиён  дар  фасли тобистон  корҳои  назаррасро  анҷом  медиҳад.
Мувофиқи  маълумоти  пешакӣ,  имсол дар  саросари  кишвар  ифтитоҳи  4  ҳазору 227  лагер  дар  назар  аст.
Тахмин  меравад, ки  лагерҳо  дар  чор  баст  кор  карда, дар  ҳар  басти он 357  ҳазору 242  нафар  истироҳат  мекунад. Имсол ятимони оилаҳои  камбизоат,  кӯдакони  болаёқат,  гирандагони  идрорпулӣ —    аъзои Академияи  хурди илмҳои  ҷумҳурӣ,  чун  солҳои  пештара, метавонанд  дар  лагерҳо ба таври  ройгон  истироҳат  кунанд.
Хотирнишон  месозем, ки  соли  гузашта  дар  3  ҳазору 779  лагер 350  ҳазору 253  нафар кӯдакону  наврасон  истироҳат  карда буданд.