Ҷалби магистрантон ба Донишкадаи молия ва иқтисод
Душанбе, 18.07.2014. (АМИТ «Ховар», Маҳина Сафоева).- Дар соли таҳсили 2013-2014 дар Донишкадаи молия ва иқтисоди Тоҷикистон 8-монография, 7-китоби дарсӣ, 32-воситаи таълимию дастури методӣ дар Шӯрои илмӣ -методӣ баррасӣ гардида ба чоп тавсия шудаанд. Инчунин аз ҷониби ҳайати профессорону устодон 560 мақолаҳои илмӣ дар маҷмуаҳои гуногуни дохилӣ ва хориҷӣ ба чоп расидаанд,- гуфт зимни нишасти матбуотӣ ректори донишкада Ашурбой Солиев.Тибқи иттилои ректори донишкада моҳи майи соли 2014 нахустин шумораи маҷаллаи илмии «Паёми ДМИТ» ба табъ расид, ки 5 бахшро фаро мегирад.Қайд кардан зарур аст, ки дар донишкада сол ба сол тамоюли рушди кадрҳои илмӣ дида мешавад.Нисбат ба соли 2009 алҳол шумораи номзадони илм ба 98 нафар расидааст. Дар аспирантураи донишкада айни замон 31 нафар аспирантон ба таҳсил фаро гирифта шудаанд, ки онҳо бо мавзӯъҳои таҳқиқотӣ ва роҳбарони илмӣ таъмин мебошанд.Инчунин Ашурбой Солиев зикр намуд, ки тибқи низомномаи Комиссияи аттестатсионии давлатӣ донишҷӯёне, ки донишкадаро дар зинаи мутахассис ва бакалавр бо баҳои аъло хатм менамоянд, метавонанд ба ҳайси аспирант ва магистр қабул гарданд.