Даъвати раиси шаҳр аз соҳибкорон

    Душанбе, 14.10.2014.(АМИТ «Ховар», Марзия Саидзода).-Дар доираи таҷлили ҷашни 90-солагии пойтахт раиси шаҳри Душанбе Маҳмадсаид Убайдуллоев бо соҳибкорон ва доираҳои тиҷоратии пойтахт мулоқот намуд.
Раиси  шаҳр ба соҳибкорон барои саҳми арзандаашон дар рушди соҳаҳои мухталифи пойтахт ва ғанӣ гардонидани буҷаи он аз номи шаҳрдорӣ арзи сипос намуда, гуфт, ки соҳибкорони пойтахт минбаъд низ неруи созандаи худро баҳри ободонию пешрафти Душанбе равона хоҳанд кард.
  Зикр гардид, ки даромади умумии буҷети пойтахт сол аз сол афзоиш меёбад. Танҳо дар соли 2013 ба буҷети ҷумҳуриявӣ беш аз  650 миллион сомонӣ  ворид шудааст, ки баробари 33,5  фоизи буҷети солона буда, дар он саҳми соҳибкорони  пойтахт низ калон аст.  
  Дар фарҷоми мулоқот Маҳмадсаид Убайдуллоев  аз соҳибкорон даъват кард, ки дар ташкили ҷойҳои нави корӣ, рушди истеҳсолот ва кумак ба оилаҳои камбизоат ва дигар қишрҳои ниёзманди  ҷомеа дар доираи фаъолияти эҳсонкорӣ саҳми муносиб гузоранд.