Беҳтарин ҷоизаи байналмилалӣ ба «Лаку Пак»
Душанбе, 3.11.2014. (АМИТ «Ховар», Мавҷуда Анварӣ).- «Намоишномаи «Лаку Пак»-и Театри мусиқӣ — мазҳакавии ба номи Ато Муҳаммадҷонови шаҳри Қурғонтеппаи вилояти Хатлон дар V-умин ҷашнвораи байналхалқии театрҳои Осиёи Марказӣ, ки аз 25 то 31-уми октябр дар кишвари Қозоқистон баргузор шуд, соҳиби беҳтарин ҷоиза ва дипломи махсуси ҷашнвора барои ҷуфти беҳтарин гардид»,- иттилоъ дод Аловуддин Абдуллоев дар суҳбат ба хабарнигори АМИТ «Ховар».
Ба гуфтаи А. Абдуллоев дар ҷашнвора беҳтарин намоишномаҳои театрҳои кишварҳои Осиёи Марказӣ, аз ҷумла Қазоқистон, Қирғизистон, Ӯзбекистон, Русия пешкаши ҳаводорони театр гардид. Тоҷикистонро дар ин ҷашнвора намоишномаи ҳаҷвии «Лаку Пак» аз афсонаи машҳури «Лаку Пак», ки аз ҷониби Абдулҳафиз Қодирӣ ва Иброҳим Усмон таҳия гардида, ҳунарпешаи маъруф Парвиз Раҷабов коргардон ва басаҳнагузорандаи он мебошад, муаррифӣ намуд.
Нақшҳои асосии «Лаку Пак»-ро ҳунарпешаи маъруф Меҳринисо Ҳоҷибоева ва Ҳунарпешаи халқии Тоҷикистон Аловуддин Абдуллоев иҷро карданд.
«Лаку Пак» намоишномаест, ки аз унсурҳои шеър, мусиқӣ, бадеҳа, фолклор, рақс, намоиши бесадо ва ҳам тақлид иборат аст.