Афзоиши теъдоди вайронкунии қоидаҳои роҳ

Хуҷанд, 12.01.2015. (АМИТ “Ховар”, Абдуаҳад Шарифзода).-Дар  шимоли кишвар  дар соли 2014 аз ҷониби ронандагони воситаҳои нақлиёт майли афзоиши теъдоди қоидавайронкунӣ ба қайд гирифта шудааст.  Тавре  ки ба  АМИТ  “Ховар”  аз шуъбаи Бозрасии  давлатии автомобилии Раёсати  ВКД  ҶТ дар вилояти Суғд иттилоъ доданд,  аз ҷониби масъулини шуъбаи  мазкур ва сохторҳои  поёнии  он  соли  2014 — 359 ҳазору 479 ҳолати вайронкунии қоидаҳои ҳаракати роҳ  ошкор шуд, ки ин нишондод аз давраи соли пешин 4,4% зиёд аст.
Хосатан қоидавайронкуниҳое, чун идораи мошин бе шаҳодатномаи ронандагӣ — 5,9%; бе аломатҳои қайди давлатӣ — 6,5%; истифодаи воситаи нақлиёт бе иҷозат бо шишаҳои сиёҳкарда — 38,7%; қоидаҳои мусофиркашонӣ — 39,8%; баланд  намудани меъёри суръати ҳаракат — 2,2% ва ғайра афзоиш   ёфтаанд.