ДМИТ: ҷараёни таҳсил дар 30 ихтисос тибқи низоми кредитист

Душанбе, 23.01.2015. (АМИТ Ховар, Раъно Нусратуллозода).-Тибқи нақшаи гузариши давра ба давраи ихтисосҳои донишкада ба низоми кредитии таҳсилот то имрӯз дар  6 факулта ҷараёни таълим аз рӯи 30 ихтисос тибқи низоми кредитии таҳсилот амалӣ мегардад. Ин матлабро дирӯз ректори Донишкадаи молия ва иқтисоди Тоҷикистон Ашурбой Солиев зимни нишасти матбуотӣ оид ба фаъолияти солонаи донишка иброз дошт.
А.Солиев гуфт, ки натиҷаи самаранокии таҷрибаомӯзии таълимӣ ва истеҳсолии донишҷӯёни  таҳсили шуъбаи ғоибона ва рӯзонаи  донишкада дар соли 2014  аз рӯи баҳои ҳимояи ҳисоботи таҷрибаомӯзӣ  нишон медиҳад, ки азхудкунӣ дар таҷрибаомӯзӣ 99,8 фоизро ташкил дода, нисбат ба соли 2013 дар соли 2014   9 фоиз зиёд шудааст, ки ин шаҳодати бастани шартномаҳо бо ташкилоту муассисаҳо ва сари вақт гузаронидани таҷрибаомӯзиҳо ва мавҷудияти маводи методӣ оид ба таҳияи ҳисобот ва ҳимояи онҳо ба ҳисоб меравад.
Дар маҷмӯъ, тибқи тақсимоти мутахассисони ҷавони соли 2014  ба 156 нафар бо роҳхатҳои Вазорати маориф ва илми Ҷумҳурии Тоҷикистон ҷойи кор тақсим гардид. 
Дар нишаст зикр гардид, ки дар ду соли охир гурӯҳҳои буҷетиро ҳамагӣ  293 нафар  донишҷӯ хатм карда, бо ҷойи кор таъмин шуданд.