Ҳамадонӣ: Хизмат дар сафи қувваҳои мусаллаҳ ифтихор аст

Ҳамадонӣ, 7.04.2015. (АМИТ «Ховар», Сулаймони Хол).-Бо оғози маъракаи даъвати ҳарбӣ ба сафи Қувваҳои мусаллаҳи Ҷумҳурии Тоҷикистон дар соли 2015 ба комисариати ҳарбии ноҳияи Мир Саид Алии Ҳамадонӣ шумораи зиёди ихтиёриён ҳозир гардиданд. 
Ба қавли  Нураҳмад Қурбонов, комиссари ҳарбии ноҳия ба ин муносибат дар саҳни ҳавлии комиссариати ҳарбӣ ҷамъомади бошукӯҳ доир гардида, дар он раиси комиссияи даъват, муовини раиси ноҳияи Ҳамадонӣ, собиқадорони ҷангу меҳнат, ҷанговарони башардӯст ва сарбозони қисми низомии 21-33 ва сарбозони Кумитаи ҳолатҳои фавқулода даъватшавандагон ва волидайни онҳоро табрик гуфтанд. 
Бояд гуфт, ки дар рӯзи аввали даъват 40 нафар ҷавон ихтиёран ба комиссариати ҳарбӣ ҳозир шуд. Чорабиниҳои ташкилнамудаи комисариати ҳарбӣ дар ҳамдастӣ бо шуъбаи маориф ва бахши ҷавонон, варзиш ва сайёҳӣ дар ин самт самараи хуб бахшидаанд.