Баррасии ҳамкориҳои Тоҷикистон бо Комиссияи байнидавлатии СААД

Душанбе, 08.04.2015 (АМИТ «Ховар», Фарзонаи Давлат).- Имрўз вазири саноат ва технологияҳои нави Ҷумҳурии Тоҷикистон Шавкат Бобозода бо раиси Шўрои кории назди Комиссияи байнидавлатии Созмони Аҳдномаи амнияти  дастаҷамъӣ (СААД) Ноздрачев Александр Василевич ва мушовири Котиботи СААД Никулшин Константин Анатолевич  мулоқот кард.
Бино ба иттилои котиботи Вазорати саноат ва технологияҳои нави кишвар,зимни мулоқот масъалаҳои ба миён омада дар миқёси  Созмони Аҳдномаи Амнияти  Дастаҷамъӣ ҷиҳати ҳамкориҳои судманд дар самти истеҳсоли маҳсулоти саноати мудофиавӣ, ташкили корхонаҳои муштарак оид ба коркарди тибити пахтагин ва дар оянда ташкил кардани истеҳсолоти селлюлоза дар заминаи КВД «Нури Ховар», истеҳсоли матоъ, либос  барои ташкилотҳои мудофиавӣ дар заминаи ҶММ «Хуҷанд Инвест Котон», ҳамчунин дар миқёси СААД ба роҳ мондани ҳамкориҳои дуҷонибаи ширкати бузурги истеҳсоли пойафзол «Фариде»-и Русия бо ҶММ «Пойафзоли чармӣ» барои истеҳсоли пойафзоли чармӣ бо истифода аз дастгоҳу таҷҳизоти замонавӣ мавриди баррасӣ қарор гирифтанд.
Гуфта мешавад ҷонибҳо аз натиҷаи вохурӣ изҳори қаноатмандӣ намуда, ҳамчунин иброз доштанд, ки густариши ҳамкориҳои дуҷониба  ба манфиати ҷонибҳо хоҳад буд.