Хуҷанд: сафарбарии гурӯҳи ихтиёриён ба артиш

 
Хуҷанд, 02.04.2015. (АМИТ «Ховар», Абдуаҳад  Шарифзода).-     Шурӯъ аз 1-уми апрел дар кишвар даъвати баҳорӣ ба сафи неруҳои мусаллаҳи Тоҷикистон оғоз гардид. Дар шаҳри Хуҷанд низ баҳри таъмини даъвати баҳорӣ таҳти роҳбарии муовини аввали раиси шаҳр ситоди даъвати баҳорӣ ташкил шудааст.
Зӯҳри имрӯз  гурӯҳи аввали даъватшавандагони Хуҷандшаҳр ба сафи Қувваҳои мусаллаҳи кишвар иборат аз 40 нафар сафарбар шуд. 
Соли равон низ тантанаи гусели гурӯҳи аввалини нахустихтиёриён дар назди майдони Исмоили Сомонии шаҳр доир гардид, ки дар он роҳбарияти шаҳр, волидайну наздикони даъватшавандагон, собиқадорони  ҷангу  меҳнат,  ҳамчунин  намояндагони  сохторҳои марбута иштирок доштанд.
Раиси  шаҳри Хуҷанд Раҷаббой Аҳмадзода дар назди ҳозирин баромад намуда, зикр  намуд, ки  хидмат  дар  сафҳои  Қувваҳои  мусаллаҳ  вазифаи  ҳар  шаҳрванди  кишвар буда, хурсандиовар аст, ки сол аз сол теъдоди  ихтиёриёне, ки  хоҳиши  адои  хидмат  дар сафҳои  Қувваҳои  мусаллаҳи  кишварро  доранд,  бамаротиб  меафзояд. Чорабинии гусели наваскарон бо барномаи фарҳангӣ ва супоридани туҳфаҳои  хотиравӣ анҷом ёфт. 
Тибқи маълумоти Ситоди шаҳрӣ оид ба даъват мувофиқи тақсимот дар даъвати баҳории имсола аз Хуҷанд 165 нафар ҷавонписар ба хизмат сафарбар хоҳад шуд. 
Бояд гуфт, ки сафарбарии гурӯҳи аввалини даъватшавандагони вилояти Суғд ба қисмҳои низомии кишвар 3 апрел дар назар гирифта шудааст. 
Хотиррасон мекунем, ки даъвати баҳорӣ аз 1 апрел оғоз ёфта, то 31 май давом мекунад.