«Корвони саломатӣ» дар Кӯлоб

Кӯлоб,22.04.2015. (АМИТ «Ховар», Сулаймони Хол).-Бо ибтикори  Вазорати тандурустӣ ва ҳифзи иҷтимоии аҳолии Ҷумҳурии Тоҷикистон ҳамасола дар минтақаҳои гуногуни кишвар «Корвони саломатӣ» гузаронида  мешавад, ки беҳтарин мутахассисони соҳа ба таври ройгон сокинонро ташхис менамоянд.  
Чанде пеш «Корвони саломатӣ»  бо ҷалби беш аз 20 нафар профессору духтур дар назди бинои Маркази саломатии шаҳри Кӯлоб беморонро ташхису муоина кард. 
Бино ба иттилои  Шайдулло Шарифов, корманди  Вазорати тандурустӣ ва ҳифзи иҷтимоии аҳолӣ  дар муоинаи сокинони ин минтақа дар баробари ҷалби мутахассисон, инчунин техникаи муосири соҳавӣ низ истифода мешавад. Дар давоми 5 соат 130 нафар аз ташхиси рентгенӣ, беш аз 200 нафар ташхиси ултрасадоӣ ва 15 нафар тамогрофӣ гузаронида шуд. Ҷарроҳии бемороне, ки мувофиқи нақша дар ин рӯз муайян гардида буд, ба тарзи ройгон сурат гирифт.