“Лайлӣ ва Маҷнун” боз дар саҳнаи Театри опера ва балет

Душанбе, 23.04.2015. (АМИТ “Ховар”,Марҳабои Азамат).- 30 апрел Театри давлатии академии опера ва балети ба номи Садриддин Айнӣ балети афсонавии “Лайлӣ ва Маҷнун”- ро манзури  ҳаводорони санъат мекунад.
Тавре ки аз Театри опера ва балет хабар доданд, бастакори номӣ  Сергей Баласанян барои балети “Лайлӣ ва Маҷнун”, ки дар асоси достони машҳури Низомии Ганҷавӣ офарида шудааст, оҳангҳои зебою дилнишинро офаридааст.
“Эҷодиёти Сергей Баласанян хусусияти интернатсионалӣ дошта, дар он фолклори кишварҳои мухталифи Шарқ ҳис карда мешавад.
Доираи манофеи эҷодии С.Баласанян эҷодиёти халқии Арманистону Тоҷикистон, Африқо ва Амрикои лотиниро фаро мегирад”,- зикр намуд сарбалетмейстери театр Мария Левитская.
Ба гуфтаи Мария Левитская, ҳаводорони санъат ҳангоми тамошои балети “Лайлӣ ва Маҷнун” бори дигар бо ҳунарпешагони дӯстдоштаашон Муҳаммад Аминзода, Александр Бахман, Умед Сангализода, Бахтиёр Давлатов, Комила Ҷобирова, Мавлуда Орифова ва ғайра вомехуранд.