Муҳоҷирони соҳаи кишоварзӣ аз супоридани тест озод мешаванд

Душанбе, 28.04.2015. (АМИТ  «Ховар», Лайло Тоирӣ).- Тибқи иттилои намояндаи Думаи давлатии вилояти Воронежи Федератсияи Русия он муҳоҷироне, ки дар соҳаи кишоварзӣ фаъолият менамоянд, аз супоридани тест (имтиҳон) аз забони русӣ, таърих ва асосҳои қонунгузории Федератсияи Русия озод мешаванд. 
Тавре ки ба рӯзномаи «Известия» вакили Думаи давлатии вилояти Воронеж Вячеслав Астанков иттилоъ дод, ин тасмим ба хотири он гирифта шудааст, ки барои ба даст овардани иҷозат барои кор муҳоҷирони меҳнатӣ вақтро сарф мекунанд, дар минтақаҳо ба қувваи корӣ ниёз доранд ва хатари талафи зироат меафзояд.
То охири моҳи апрели соли 2015 ба Думаи давлатии Русия лоиҳаи Қонун оид ба муҳоҷирони меҳнатие, ки дар соҳаҳои боғу токпарварӣ, инчунин кишти бодиринг ва картошка фаъолият менамоянд, аз гузаштани имтиҳони ҳатмии забони русӣ, таърих ва асосҳои қонунгузории Русия озод мешавад.
Ёдовар мешавем қаблан Вазорати фарҳанги Федератсияи Русия лоиҳаи Қонун «Дар бораи мутахассисони баландихтисоси эҷодӣ, соҳаҳои гуногуни театр, директорони намоишгоҳи санъатӣ, сирк ва дигар мутахассисони соҳаи фарҳанг»-ро ҷиҳати насупоридани имтиҳон аз забони русӣ, таърих ва асосҳои қонунгузории ФР эълон карда буд.
Дар ин бора ба АМИТ «Ховар» сухангӯи Хадамоти муҳоҷирати Вазорати меҳнат, муҳоҷират ва шуғли аҳолӣ А.Қодирӣ хабар дод.