Мулоқоти сафири Тоҷикистон бо вакили Конгресси ШМА

Душанбе, 16.04.2015 (АМИТ «Ховар»).- 15 апрели соли 2015 мулоқоти Сафири Ҷумҳурии Тоҷикистон дар Иёлоти Муттаҳидаи Амрико Фарҳод Салим бо вакили Палатаи намояндагони Конгресс, аъзои зеркумита оид ба масъалаҳои Аврупо ва Авруосиёи Кумитаи байналмилалии Палатаи намояндагони Конгресс (намояндаи ҳавзаи №8, штати Ню Ҷерси) Албио Сирес барпо гардид.
Дар мулоқот ҷонибҳо масъалаҳои лағви иловаи Ҷексон-Веник, вазъи минтақа ва Афғонистон ва таҳкими ҳамкориҳои амнияти сарҳадиро баррасӣ намуданд.
Сафир изҳороти матбуотиро оид ба Конфронси байналмилалии сатҳи баланд роҷеъ ба татбиқи Даҳсолаи байналмилалии амал “Об барои ҳаёт”, 2005-2015, ки 9-11 июни 2015 дар Душанбе баргузор мегардад, ба Конгрессмен супурд ва аз ӯ ҷиҳати ширкат дар чорабинӣ даъват ба амал овард.