Ҳусом Муғозӣ дар Конфронси оби Душанбе ширкат мекунад

Душанбе, 25.05.2015 (АМИТ «Ховар»).- 21 майи соли 2015 расонаҳои мисрӣ хабареро мунташир намуданд, ки бино бар он Миср таъйид кардааст, ки дар Конфронси байналмилалии сатҳи баланд роҷеъ ба татбиқи Даҳсолаи байналмилалии амал “Об барои ҳаёт”, солҳои 2005-2015, ки онро Тоҷикистон 9-11 июни соли ҷорӣ мизбонӣ ва Президенти Тоҷикистон Эмомалӣ Раҳмон ва Дабири кулли СММ Пан Ги Мун расман мекушоянд, ширкат хоҳад намуд. 
Қарор аст, ки ҳайати мисриро дар конфронс доктор Ҳусом Муғозӣ, вазири захираҳои об ва обёрӣ намояндагӣ кунад. Аз сӯи дигар, Дабирхонаи Ҷомеаи давлатҳои арабӣ эълом намудааст, ки хонум Шуҳра Қасиа, мудири Маркази пажӯҳиши об ва амнияти оби арабӣ ба намояндагӣ аз Дабирхонаи Ҷомеаи давлатҳои арабӣ дар ин конфронс ширкат хоҳад кард.
Дар баёнияе, ки онро Сафорати Тоҷикистон дар Қоҳира паҳн намудааст, омадааст, ки иштироки Пан Ги Мун аҳамияти ҳамоиши байналмилалии мазкурро барои Созмони Милали Муттаҳид ва тамоми ҷомеаи байналмилалӣ, ба вижа дар партави қабул гардидани Ҳадафҳои рушди устувор, аз ҷумла тазмини дастрасӣ ба оби поки ошомиданӣ ва беҳдошт барои ҳама ва таҳкими идораи устувори захираҳои обӣ ба таври возеҳ таъкид мекунад.
То ба имрӯз беш аз 70 кишвар дар сатҳи нахуствазирон, вазирони корҳои хориҷӣ, вазирони захираҳои об, инчунин 50 созмони байналмилалӣ ва минтақавӣ иштироки худро дар конфронси Душанбе таъйид намудаанд.