Анҷоми марҳилаи якуми «Нелегал-2015» дар Хатлон

Душанбе, 20.05.2015. (АМИТ «Ховар», Лайло Тоирӣ).-Марҳилаи якуми амалиёти муштараки фаврӣ-пешгирии «Нелегал-2015» дар Раёсати Хадамоти муҳоҷирати Вазорати меҳнат, муҳоҷират ва шуғли аҳолии Ҷумҳурии Тоҷикистон дар вилояти Хатлон, ки аз 11 то 18 майи соли равон идома дошт, хотима ёфт. Раёсати Хадамоти муҳоҷират дар вилояти Хатлон дар якҷоягӣ бо сохторҳои қудратӣ дар вилоят чорабиниҳои фаврӣ-пешгирӣ ва амалиёти махсус оид ба мубориза бар зидди муҳоҷирати ғайриқонунии шаҳрвандони кишварҳои сеюм, аз ҷумла хариду фурўши одамон (дар робита бо СААД)-ро баргузор намуд. Дар ҷараёни амалиёти «Нелегал-2015» аз тарафи кормандони Раёсати Хадамоти муҳоҷират дар вилояти Хатлон дар якҷоягӣ бо кормандони шуъбаи Хадамоти муҳоҷират дар шаҳри Кўлоб дар «Фурудгоҳи байналмилалии шаҳри Кўлоб» ҳуқуқвайронкунии маъмурии як нафар шаҳрванди Федератсияи Русия барои риоя накардани қоидаҳои будубош дар қаламрави Ҷумҳурии Тоҷикистон ошкор шуд. Нисбат ба он бо моддаи 499 қисми 1 Кодекси ҳуқуқвайронкунии маъмурӣ парвандаи маъмурӣ тартиб дода шуд. Марҳилаи дуюми амалиёти «Нелегал-2015» аз 21 сентябр то 9 октябри соли ҷорӣ оғоз мегардад.