Бархурдорӣ аз фарҳанги волои оиладорӣ

Душанбе, 18.05.2015. (АМИТ «Ховар», Назир Назиров).- 15-уми майи соли ҷорӣ дар Кумитаи ҳифзи муҳити зисти назди Ҳукумати Ҷумҳурии Тоҷикистон бахшида ба Рӯзи байналмилалии оила ҷамъомад баргузор гардид,. Раиси Кумитаи ҳифзи муҳити зисти назди Ҳукумати Ҷумҳурии Тоҷикистон Хайрулло Ибодзода дар мавриди ин рӯз сухан гуфт.
Зикр шуд, ки оила асоси зиндагӣ ба шумор рафта, мактаби бузургест барои ташаккули маърифату инсони воқеӣ будани кас.  Дар муносибати оиладорӣ ва идораи оила ҳамон нафар муваффақ мегардад, ки аз мактаби бузурги маърифати оиладории волидайни худ   сабақи дуруст андўхта бошад.  
Мусаллам аст, ки ниёгони пурифтихори мо аз фарҳанги  волои оиладорӣ хеле хуб бархурдор буданд. Агар аз даричаи  асри имрўз ба гузашта назар афканем, баръало мушоҳида мегардад, ки шахсиятҳои оламшумули адабиётамон роҳҳои ибратомўзи оиладориро пешорўи мо гузоштаанд, ки истифода аз ин махзани ройгони маърифат барои баланд гардидани маърифати оиладории ҳар як фард таъсири мусбат хоҳад расонд. 
Масалан, вақте кас «Гулистон»-и Саъдии Шерозӣ, «Қобуснома»-и Унсурулмаолии Кайковус, «Оила»-и Абдурауфи  Фитрат ва «Таҳсибуссибён»-и Устод Айнӣ барин шахсиятҳои адабиро мутолиа  мекунад, бешубҳа дар зиндагии оилавӣ саодатманд хоҳад буд.
Таассуфовар ин аст, ки  имрўзҳо майл кардани ҷавонону наврасон ба фарҳанги бегона ҳар нафари бонангу орро бетараф гузошта наметавонад.
Ҳанўз ҳам кўдакони беназоратро мебинем, ки дар бозору кўчаҳо беҳудагардӣ карда, аз бемасъулиятии волидон  ҳатто даст ба ҷиноятҳои вазнин мезананд. Волидони ин қабил кўдакон боре намеандешанд, ки   беэътиноии  онҳо маънои фарзандонашонро бо дасти худ ба ҷинояткорӣ тела доданро дорад. Оқибат фарзандон аз волидони хеш домангир мешаванд. Ин ҳама аз он дарак медиҳад, ки дар  баъзе оилаҳо тарбияти кўдакон ҷавобгўи фарҳанги оиладорӣ нест.
Таҷрибаи чандинасраи оиладорӣ дар фарҳанги тоҷикон нишон медиҳад, ки нақши волидон, махсусан модарон дар тарбияи фарзанд беназир аст. Яъне, он тарбия ва меҳру муҳаббатеро, ки модар ба фарзанди худ медиҳад, онро ягон мураббию омўзгор дода наметавонад. 
Масъалаҳои марбут ба оиладорӣ нозукиҳои худро доранд, ки аз кас масъулиятшиносиву сабру тоқат ва маърифату дониши волоро талаб мекунанд. Ин аст, ки  Президенти мамлакат дар Паёми имсолаашон ба Маҷлиси Олии ҷумҳурӣ баён дошт: “Масъалаҳои маърифати оиладорӣ, баланд бардоштани масъулияти падару модарон дар таълиму тарбияи фарзанд, омода кардани фарзандон ба ҳаёти мустақилона ва пойдории оила аз ҷумлаи мушкилоте мебошанд, ки диққати доимии тамоми мақомоти давлатӣ, муассисаҳои таҳсилотӣ ва кулли аъзои ҷомеаро тақозо мекунанд”.