Таҷлили ҷашни Ғалаба дар Брюссел

Душанбе, 13.05.2015 (АМИТ «Ховар»).- 9 майи соли 2015 Сафорати Ҷумҳурии Тоҷикистон дар шаҳри Брюссел дар якҷоягӣ бо сафоратҳои кишварҳои Арманистон, Беларус, Булғористон, Ветнам, ИМА, Италия, Қазоқистон, Қирғизистон, Куба, Лаҳистон, Македония, Маҷористон, Малдова, Муғулистон, Озарбойҷон, Олмон, Русия, Сербия, Словакия, Туркманистон, Ӯзбекистон, Фаронса, Чин ва Чехия дар маросими ёдбуди аскарони собиқ Иттиҳоди Шӯравӣ ва иштирокчиёни Ҳаракати Муқовимати Белгия, ки дар солҳои Ҷанги дуюми ҷаҳонӣ баҳри озод намудани Шоҳигарии Белгия аз фашизм ҷоннисорӣ намудаанд, иштирок кард. Намояндагони баландпояи ин кишварҳо дар зери пайкараи аскарони собиқ Иттиҳоди Шӯравӣ ва иштирокчиёни Ҳаракати Муқовимати Белгия, ки дар қабристони коммунаи Эвери шаҳри Брюссел воқеъ аст, гулчанбарҳо гузоштанд.Қобили зикр аст, ки дар доираи ҷашни 70-умин солгарди Ғалаба дар шаҳри Брюссел, дар таърихи 6 майи соли 2015 дар Маркази русии илм ва фарҳанг филми бадеии Тоҷикфилм аз соли 1978 таҳти унвони Зане аз роҳи дур ва аксҳои марбута ба намоиш гузошта шуданд.