Беш аз 100 бурсияи Чин ба довталабони тоҷик

Душанбе, 08.07.2015. (АМИТ «Ховар», Ситораи Боймурод).-  Ба иттилои Вазорати маориф ва илми кишвар дар давраи ҳисоботӣ дар муассисаҳои таҳсилоти олӣ ва илмии хориҷи кишвар як силсила корҳо ба анҷом расонида шуданд. Аз ҷумла, дар асоси ҳамкории кишварҳои узви Иттиҳоди давлатҳои Мустақил дар соҳаи маориф ва илм аз ҷониби Вазорати маориф ва илми Федератсияи Русия 687 бурсия ва аз Ҷумҳурии Қирғизистон 55 ҷой ҷудо гардидааст.
Бино ба иттилои вазири маориф ва илми ҷумҳурӣ Нуриддин Саид дар соли таҳсили 2015-2016 аз ҷониби Ҷумҳурии мардумии Чин барои таҳсили шаҳрвандони Тоҷикистон 189 бурсияи таҳсилӣ ҷудо гардида, имтиҳони қабули довталабон ба муассисаҳои таҳсилоти олии касбии Чин моҳи  марти соли равон дар сафорати Ҷумҳурии мардумии Чин дар ҶТ доир гардид.