Нуробод: раиси ноҳия ҷавононро ба илмомӯзию ватандӯстӣ даъват кард

Нуробод, 11.07.2015. (АМИТ «Ховар», Субҳониддини Маҳмуд).-  Бо ибтикор  ва ташаббуси Мақомоти иҷроияи ҳокимияти давлатии ноҳияи Нуробод дар ҳамбастагӣ бо шуъбаи маорифи ноҳия вохӯрии раиси ноҳия  Дӯстзода Ҳасан Тағдир бо ҷавонону  хатмкунандагони муассисаҳои таълимии ноҳия  баргузор гардид. Баргузории чунин вохӯрӣ  бо ҷавонон аз он шаҳодат медиҳад, ки таваҷҷуҳи  ҳукумати ноҳия нисбат ба таълиму тарбияи  ҷавонону наврасон хеле калон аст. Раиси ноҳия ҷавононро ба муносибати хатми мактаб шодбош гуфта, ба онҳо барои дохил гардидан ба донишгоҳу донишкадаҳо барор таманно намуд. 
Дӯстзода Ҳасан Тағдир зимни вохӯрӣ гуфт, ки  ҳадафи аслии  нишасти мо бори дигар  ҳидоят намудани ҷавонон ба илму забономӯзӣ, аз бар намудани навгониҳои илму техника, дӯст доштани ватан,  ҳифзи  музаффариятҳои истиқлолият,  арзишҳои миллӣ, арҷгузорӣ ба муқадасоти ин сарзамин, дурӣ ҷустан аз ҳаракату гурӯҳҳои иртиҷоӣ мебошад. 
          Тибқи    иттилои  сармутахассиси  шуъбаи рушди  ичтимоӣ ва робита бо ҷомеаи ноҳия Гулрухсор Неъматова 456 нафар муассисаҳои таълимии ноҳияро хатм намуда, 26 нафари он тибқи квотаи президентӣ ба макотиби олии ҷумҳурӣ дохил шуд ва 350 нафари дигар  ба Маркази миллии тестӣ ҳуҷҷат супоридааст.