Усулҳои нави идора дар «Тоҷикматлубот»

Душанбе, 22.07.2015. (АМИТ «Ховар», Ситораи Боймурод).- Дар нимсолаи якуми соли 2015 дар фаъолияти матлуботи Раёсати Иттифоқи «Тоҷикматлубот» усулҳои нави идора амалӣ гардида истодаанд. Бо мақсади таъмини самаранокӣ ва афзун намудани истеҳсоли маҳсулоти чорво, чорвои калони шохдор ва чорвои майда дар хоҷагиҳои ёрирасони махсусгардонидашудаи «Ҳисор», «Заркамар» ва «Ширкент»-и Иттифоқи «Тоҷикматлубот» мутамарказ гардонида шуданд,- гуфт муовини раиси Раёсати Иттифоқи Тоҷикматлубот Иброҳим Гулов имрӯз, 22 июл зимни нишасти матбуотӣ ба хабарнигорон.
Инчунин ҷиҳати истеҳсоли асали хушсифати табиӣ оилаҳои занбӯри асал, ки дар баъзе ташкилот нигоҳ дошта мешуданд ва самараи дилхоҳ намедоданд, дар ду минтақаи кӯҳистон, аз ҷумла ноҳияи Муъминобод ва водии Сағирдашти ноҳияи Дарвоз мутамарказ гардонида шуда, нигоҳубини онҳо аз тарафи мутахассисони касбӣ ба роҳ монда шуд.