Ҳадяи донишмандон ба ҷашни 3000 -солагии Ҳисори шодмон

 Душанбе, 14.08.2015.(АМИТ «Ховар», Марзия Саидзода).-Ба ифтихори 3000-солагии Ҳисор нашриёти «Контраст»-и Душанбе китоб-албоми мусавварро таҳти унвони «Ёдгориҳои меъмории водии Ҳисор»  аз чоп баровард.
 Китоб -албом бо забонҳои русӣ ва англисӣ бо теъдоди 500 адад мунташир гардида, муаллифонаш донишмандони тоҷик Аскаралӣ Раҷабов, Рустам Муқимов ва раиси ноҳияи Ҳисор Усмон Сабзов  мебошанд. Китоб -албом бо ибтикори Академияи илмҳои Ҷумҳурии Тоҷикистон ва мақомоти иҷроияи  ҳокимияти давлатии  ноҳияи Ҳисор мунташир гардидааст. Он хонандагонро бо мероси таърихию меъмории асримиёнагии минтақаи водии Ҳисор, ки аз Вашгирди қадима то Термезро дар бар мегирифт ва зодбуми ниёкони амири бузург Исмоили Сомони (874-907)  — нахустин асосгузори давлати мутамаркази тоҷикон маҳсуб меёбад, ошно месозад.
 Дар китоб-албом расму мусавварҳои  таърихӣ, ёдгориҳои меъморию фарҳангии ин водӣ гирд оварда шудаанд. 
 Китоб албоми мазкур барои  доираи васеи хонандагон, ки ба фарҳанги қадимаи асримиёнагии тоҷикон таваҷҷуҳ доранд тавсия  шуда, ҳадяест ба ҷашни 3000 -солагии Ҳисори шодмон, ки моҳи октябри соли равон дар сатҳи баланд таҷлил мегардад.