Амалиёти навбатии Кумитаи ҷавонон, варзиш ва сайёҳӣ

Душанбе, 06.08.2015 (АМИТ «Ховар», Фарзонаи Давлат).-Бо ибтикори Кумитаи ҷавонон, варзиш ва сайёҳӣ аз 1 август то 7 сентябри соли равон  дар қаламрави кишвар Амалиёти экологии умумиҷумҳуриявӣ бахшида ба 24 солагии Истиқлолияти давлатии Ҷумҳурии Тоҷикистон зери унвони “Ин Ватанро мо ҷавонон сабзу хуррам мекунем!” доир мегардад.
Дар амалиёт кормандони дастгоҳи марказии Кумитаи ҷавонон, варзиш ва сайёҳӣ, ташкилотҳои система ва сохторҳои маҳаллӣ бо ҷалби васеи наврасону ҷавонон ҳар рӯзи шанбе дар назди биноҳо, майдончаҳои тобеи худ, гулгашту боғҳо, кӯчаву хиёбонҳо ва биноҳои маъмуриву маишӣ корҳои ташкиливу ободониро анҷом дода, ба ин васила дар тозагию зебоии кишвар саҳм мегузоранд.
Бино ба иттилои Наврӯз Қурбонов, мутахассиси пешбари Бахши таҳлилу иттилооти Кумитаи ҷавонон, варзиш ва сайёҳӣ, мақсад аз баргузории амалиёти экологӣ тарбияи ҷавонону наврасон дар руҳияи ватанпарастӣ, арҷгузорӣ ба муқаддасоти миллӣ, тавсеа бахшидан ба корҳои ободониву созандагӣ ва сарсабзу хуррам гардонидани кишвар арзёбӣ мегардад. Дар амалиёт хоҳишмандон метавонанд иштирок намоянд.