Ҷамъбасти фестивал-озмуни ҷумҳуриявии «Оши палав» дар пойтахт

Душанбе, 21.08.2015 (АМИТ «Ховар», Фарзонаи Давлат).- Пагоҳ, 22-юми август дар Боғи  Дӯстии халқҳои пойтахт фестивал-озмуни ҷумҳуриявии «Оши палав» ҷамъбаст мегардад.
Дар фестивал ошпазҳову ҳунармандон аз  тамоми минтақаҳои ҷумҳурӣ ҷалб гардида, ҳунари  ошпазҳо ба маърази намоиш гузошта мешавад.  Дар рафти фестивал,  аз ҷумла маҳсулоти ҳунармандон, ки ба оши палав марбутанд, аз қабили корд, кафгир, тахтача, дег, табақ дастархон ва ғайра намоиш дода, ба  фурӯш гузошта хоҳанд шуд. 
Дар назар аст, ки дар фестивал озмунҳои гуногуни «Ошпази беҳтарин», «Оши палави беҳтарин», «Дастони моҳир», «Дастархони ороста» ва «Табақи дилкаш» гузаронида мешаванд. Ғолибони озмун бо диплом ва тӯҳфаҳо қадрдонӣ хоҳанд шуд.  
Ёдрас мешавем, ки фестивал-озмун дар ду давра гузаронида шуд, ки даври ҷамъбастӣ ҷумҳуриявии он пагоҳ, 22-юми август доир мегардад.