Ҳамла ба Дустум хунсо шуд

Душанбе, 22.08.2015. (АМИТ «Ховар»). — Ба гузориши шабакаи «Спутник.нюс», бо такя ба телевизиони «Скай нюси арабӣ», дирӯз афроди мусаллаҳи ҷунбиши толибон ба корвони мошинҳои Абдуррашид Дустум – муовини аввали раёсати ҷумҳури Афғонистон ҳамла намуданд.
Тибқи маълумоти телевизиони мазкур, толибон бар қатори мошинҳои ҳомили Дустум дар яке аз ҷодаҳои вилояти Форёби кишвари Афғонистон ҳамла намуда, ба муқовимати муҳофизини генерал Дустум рӯ ба рӯ шудаанд. Дар ин задухурд ҳашт ифротӣ кушта шудааст.
Вале хабаргузории «Ҷумҳур», бо такя ба манбаъ овардааст, ки дар ин ҳамла 10 ҳуҷумкунанда кушта ва наздики 15 нафари дигар дастгир шудаанд, ки чанд тани   онҳо дар пайи муқовимат захмӣ шуданд. Ҳамчунин, дар хабаргузории мазкур омадааст, ки ҳанӯз гурӯҳе масъулияти ин ҳамларо ба уҳда нагирифтааст, вале наздикони генерал Дустум онро кори дасти ҷунбиши толибон медонанд.