Ба соҳибкорони маҳаллӣ зиёда аз 1 млн. сомонӣ дода шудааст

Душанбе, 03.08.2015. (АМИТ «Ховар», Субҳони Маҳмуд).- Дар давоми шаш моҳи соли равон ба 272 нафар сокинони ноҳияи дурдасти Тавилдара аз тарафи шуъбаҳои  маҳаллии «Амонатбонк»,  «Ориёнбонк»,  «Тоҷиксодиротбонк» ва Хазинаи «Боршуд» ба маблағи 1 млн. 872 ҳазор сомонӣ қарзҳои имтиёзнок ва дарозмуддат дода шудааст.
Тавре ки ба хабарнигори АМИТ «Ховар»  иттилоъ дода шуд, қарзҳои мазкур барои рушди соҳибкорӣ, кишоварзӣ, чорводорӣ ва занбурпарварӣ равона шудаанд.
Ба воситаи ин  бонкҳо дар нимсолаи аввали соли равон аз хориҷи кишвар 619 ҳазору 350 доллари ИМА маблағи муҳоҷирони корӣ ворид шудааст, ки нисбат ба ҳамин давраи соли 2014 мутаносибан 450 ҳазор сомонӣ ва 204 ҳазору 200 доллари ИМА камтар мебошад.