Бунёди корхонаҳои нав дар Турсунзода

Турсунзода, 25.08.2015 (АМИТ «Ховар»,).- Ду корхонаи нави истеҳсолӣ дар ҷои собиқ корхонаи чинибарории шаҳри Турсунзода арзи вуҷуд кард. Корхонаҳои мазкур пайваста фаъолияташонро васеъ менамоянд. Аз ҷумла коргарони корхонаи ҶДММ «Вежа», ки ба истеҳсоли хиштҳои сохтмонӣ, хиштҳои ба оташтобовар ва тахтасангҳо машғуланд, мақсад доранд, ки истеҳсоли хиштро ба як миллиён дона расонанд. Корхонаи мазкур ба истеҳсоли зарфҳои сафолӣ, аз қабили табақ, гулдон, чойникҳои барқӣ ва ғайра низ машғул аст.  Навад фоизи ашёи хоми истеҳсолиро ин коргоҳ аз ҳудуди шаҳри Турсунзода мегиранд
Илова бар ин дар шафати корхонаи мазкур, корхонаи нави дигар барои истеҳсоли доруҳои табобатӣ арзи ҳастӣ кард, ки дар рӯзҳои наздик ба кор оғоз хоҳад намуд. Бо оғози фаъолияти корхонаҳои  зикргардида, беш аз 300 нафар бо ҷои кори доимӣ таъмин хоҳанд шуд.