Дар «Базмгоҳи Чилгазӣ» 12 нафар ба кор таъмин шуданд

Душанбе,  12.08.2015 (АМИТ «Ховар», Рафоати Абдулҳамид).- Тавре ки Хадамоти матбуоти раиси вилояти Суғд хабар додааст, дар деҳоти Чилгазии шаҳри Исфара боз як иншооти  ҷамъиятӣ барои баргузории ҷашну маъракаҳои мардумӣ — «Базмгоҳи Чилгазӣ» мавриди истифодаи мардум қарор дода шуд.
Ба иттилои Иқбол Тешаев, сухангӯи шаҳрдори Исфара бинои замонавии дуошёнаи Базмгоҳи Чилгазӣ — ро бо маблағгузории соҳибкорон — бародарон Абдунаим, Абдуқаҳҳор ва Абдуғафур Эшоновҳо сохтмончиёни ҳунарманди маҳаллӣ бо тарҳу намуди муосир ва харҷи 640 ҳазор сомонӣ, дар муддати як сол бунёд намуданд. 
Дар Базмгоҳи Чилгазӣ 12 нафар сокинони бешуғли деҳа соҳиби ҷойи кори доимӣ гаштанд.
Бояд тазаккур дод, ки ба ғайр аз ин базмгоҳ дар ҳудуди деҳоти Чилгазӣ дар давоми 2 соли охир боз 4 иншооти тозабунёди дигар, аз ҷумла Корхонаи коркард ва бандубасти меваи хушки Саодат, Варзишгоҳи замонавӣ барои 4000 тамошобин сохта ба истифода дода шудаанд.