Дар Сурия террористони ДИ ибодатгоҳи насрониро хароб карданд

Душанбе, 21.08.2015. (АМИТ «Ховар»). — Дар музофоти Хомси Сурия террористони гурӯҳи «Давлати исломӣ» ибодатгоҳи насронёнро хароб карданд. Дар ин бора оҷонсии “Reuters» бо такя ба маълумоти Дидбони ҳуқуқи башари Сурия хабар додааст.
Бино ба гуфтаи кормандони ҳифзи ҳуқуқ, террористон барои ба хок яксон кардани ибодатгоҳи масеҳиёни шаҳри Ал-Қарйатайн аз булдозерҳо истифода кардаанд.  
Ҳангоми забти шаҳр ифротгароён 230 нафар, аз ҷумла чанд оилаи масеҳиро асир гирифтаанд. Бино ба иттилои манбаъ, баъзе аз асирон озод гардида, 110 тани дигар ба музофоти Раққа, ки маркази маъмурии ДИ дар Сурия аст, фиристода шудаанд.