Дастури Убайдуллоев дар мавриди ҷилавгирӣ аз афзоиши фарҳанги бегона

Душанбе,20.08.2015.(АМИТ «Ховар», Марзия Саидзода).-Аз бетарафии шахсони масъул дар мавриди афзоиши таблиғи фарҳанги бегонаю хатарзо дар пойтахти кишвар, Маҳмадсаид Убайдуллоев -шаҳрдори Душанбе шадидан изҳори нигаронӣ намудааст. Мавсуф дар ин росто дар ҷаласаи корӣ ба сохторҳои марбута дастур дод, ки дар ҳамаи  марказҳои савдою тиҷорат ва бозорҳои шаҳр ворид ва фурӯши сару либоси ба фарҳанги миллӣ бегонаро  ба таври бебозгашт ҷилавгирӣ  намоянд. 
Дар ҷаласа, ҳамзамон масоили омодагии пойтахт ба ҷашни 24-умин солгарди Истиқлолияти давлатии Ҷумҳурии Тоҷикистон, баланд бардоштани фарҳанги шаҳрнишинӣ, вазъи санитарию экологӣ, дастгирии иҷтимоии қишрҳои ниёзманди ҷомеа, риояи танзими расму оин, ғанӣ гардонидани бозорҳои шаҳр, фароҳам овардани ҷойҳои нави корӣ, коҳиш додани раванди муҳоҷирати меҳнатӣ, дастрасии тарбиятгирандагони мактабу интернат, хонаҳои кӯдакон ва муассисаҳои томактабӣ бо ғизои хушсифат ва дигар масъалаҳои вобаста ба рушди шаҳрдорӣ матраҳ гардиданд.