Фаъолони ҲХДТ ба назди муҳоҷирон мераванд

Душанбе, 10.08.2015  (АМИТ «Ховар»).-Мутобиқи дастуру ҳидоятҳои Раиси Ҳизби Халқии Демократии Тоҷикистон муҳтарам Эмомалӣ Раҳмон, амалӣ намудани қарорҳои Маҷлиси Кумитаи Иҷроияи Марказии ҳизб ва Анҷумани 12-уми ҲХДТ гурўҳи калони фаъолон ва кормандони масъули ҳизб барои гузарондани мулоқоту вохўриҳо бо муҳоҷирони меҳнатии тоҷик ва мусоидат ба мушкилоти онҳо дар моҳҳои август-сентябри соли равон ба шаҳру вилоятҳои Федератсияи Русия сафари корӣ анҷом медиҳанд.
Чунон ки Муовини якуми Раиси ҲХДТ С. Фаттоҳзода тазаккур дод, ҳадафи ин сафарҳо таҳким бахшидани робита бо муҳоҷирон, бохабар шудан аз вазъи кору зиндагии онҳо, таблиғи дастовардҳои солҳои истиқлолияти давлатии Ҷумҳурии Тоҷикистон, фаҳмондани нуктаҳои барномаҳо ва ғояҳои созандаи ҲХДТ ва гирифтани пеши роҳи гароиши ҷавонон ба гурўҳҳои ифротии ба ном Давлати исломии Шому Ироқ мебошад.
Дар назар аст, ки ҳайати ҳизб дар вилоятҳо ва шаҳрҳои бузурги Русия бо корфармоёни муҳоҷирон низ вохўриҳо гузаронанд ва шароити ҷойҳои нави кориро биомўзанд, то  барои ҷалби минбаъдаи муҳоҷирон заминаи мусоид фароҳам биёваранд.
Тибқи гузориши сухангўи Ҳизби Халқии Демократии Тоҷикистон Усмон Солеҳ дар ҳайати ҳизбӣ, ки фардо озими Русия мешаванд, 25 нафар ворид шудаанд. Теъдоди мазкур ба 5 гурўҳи 4-6 нафарӣ ҷудо шуда, дар шаҳри Маскаву минтақаҳои он, вилоятҳои Ленинграду Иваново, Ростови лаби Дон, Свердловск, Новосибирску Иркутск, кишвари Краснодару ҷумҳуриҳои Тотористону Бошқирдистон суҳбату вохӯриҳо мегузаронанд.
Вохўриҳои намояндагони Ташкилоти ҷамъиятии ҷавонон «Созандагони Ватан» бо муҳоҷирони меҳнатии тоҷики муқими Федератсияи Русия дар моҳи сентябр ба нақша гирифта шудааст.