Фестивали либосҳои миллии «Хандаи ҳусн»

Душанбе, 11.08.2015. (АМИТ «Ховар», Ситораи Боймурод).- Тибқи иттилои Кумитаи кор бо занон ва оилаи назди Ҳукумати Ҷумҳурии Тоҷикистон, либос яке аз рукнҳои муҳими фарҳанги миллӣ буда, таҷассумгари анъанаҳои беҳтарин ва дирӯзу имрӯзи ҳар як миллат ба шумор меравад.
Ҳифзу нигоҳдошти либоси миллӣ дар замони муосир аҳамияти махсус касб намудааст. Ин аст, ки ҳамарӯза ба тарғибу ташвиқи он либоси миллӣ диққати ҷиддӣ дода мешавад.
Дар асоси Нақшаи чорабиниҳо оид ба муносибати «Соли оила», ки бо қарори Ҳукумати Ҷумҳурии Тоҷикистон аз 15 апрели соли 2015, тасдиқ шудааст, баргузории фестивали либосҳои миллӣ ба нақша гирифта шудааст.
Фестивали либосҳои миллии «Хандаи ҳусн», ки дар он тамоми намуди либос, аз ҷумла, либосҳои миллӣ (либосҳои қадима, кӯдакона, ҳаррӯза, идона, расмӣ, мактабӣ) ба маърази тамошо гузошта мешаванд, дар вилоятҳо ва шаҳру ноҳияҳои ҷумҳурӣ баргузор гардида истодааст. Даври ниҳоии он дар шаҳри Душанбе ҷамъбаст мегардад.