Хуҷанд: афзоиши содироти маҳсулот ба 6,8 маротиба

Суғд 14.08.2015 (АМИТ “Ховар”, Абдуаҳад Шарифзода).-Дар давоми ҳафт моҳи соли равон ҳаҷми муомилоти савдои берунии  шаҳри Хуҷанд ба 272,3 млн. доллари амрикоӣ расида, содироти маҳсулот 6,8 маротиба афзудааст. Ҳамзамон,  гардиши савдо ба 1 млрд. 103,1 миллион сомонӣ баробар шуда, нисбат ба ҳамин давраи соли гузашта 150,4 миллион сомонӣ зиёд мебошад. 
 Ба иттилои  Усмон Олимов, мудири шӯъбаи иқтисод ва савдои мақомоти иҷроияи ҳокимияти давлатии шаҳр, аз оғози сол ҳаҷми истеҳсоли маҳсулоти соҳаи саноати шаҳр  ба 351,4 миллион сомонӣ расидааст, ки он нисбат ба ҳамин давраи соли гузашта 28,1 дарсад зиёд мебошад. 
Дар ин замина нақшаи даромади буҷети шаҳр 104,7 фоиз таъмин гардида, ба буҷет зиёда аз 7,0 миллион сомонӣ маблағи иловагӣ ворид гашта, зиёда аз 8,1 ҳазор ҷойи нави корӣ таъсис дода шудааст.