Ифтитоҳи Рӯзҳои фарҳанги Тоҷикистон дар Россия

        Душанбе, 13.08.2015. (АМИТ «Ховар»). — Рӯзҳои фарҳанги Ҷумҳурии Тоҷикистон дар Федератсияи Россия оғоз гардид. Дар доираи баргузории Рӯзҳои фарҳанг 12 августи соли равон мулоқоти ҳайати расмии Тоҷикистон-муовини вазири фарҳанги Ҷумҳурии Тоҷикистон Бунафша Одинаева, сардори Раёсати илму маърифати Дастгоҳи иҷроияи Президенти Ҷумҳурии Тоҷикистон Сайфуддин Давлатзода ва сардори раёсати санъати Вазорати фарҳанги Ҷумҳурии Тоҷикистон Олимҷон Акрамов бо муовини вазири фарҳанги Федератсияи Россия Алла Манилова, сардори шӯъбаи китобдорӣ ва бойгонии Департаменти илм ва маъорифи Вазорати фарҳанги Федератсияи Россия Евгения Гусева баргузор гардид. 
Зимни мулоқот тарафҳо доир ба масоили вусъати муносибатҳои мутақобилаи фарҳангӣ, табодули таҷрибаҳо, бозомӯзии мутахассисон ва афзун намудани теъдоди квотаҳо дар муассисаҳои олии фарҳангу ҳунари Федератсияи Россия табодули афкор намуданд. Ҷонибҳо омодагии худро барои рушду густариши минбаъдаи равобити ҳамаҷонибаи судманди фарҳангии байни кишварҳои Тоҷикистону Россия изҳор доштанд.  
      Нимаи дуюми рӯзи 12 август бо иштироки ҳайатҳои расмии ҳарду ҷониб нишасти матбуотӣ барои намояндагони васоити ахбори умум баргузор гардид.
       Шоми ҳамон рӯз дар толори Кохи «Филармония-2»-и шаҳри Москва маросими ифтитоҳи расмии Рӯзҳои фарҳанги Ҷумҳурии Тоҷикистон дар Федератсияи Россия оғоз гардид.