Кумаки ноҳияҳои тобеи ҷумҳурӣ ба сокинони Бадахшон

Душанбе, 03.08.2015. (АМИТ «Ховар», Ситораи Боймурод).- Бо ташаббуси Вазорати кишоварзӣ, идораи «Тоҷикматлубот» ва Агентии захираҳои моддии назди Ҳукумати Ҷумҳурии Тоҷикистон аз ноҳияҳои Рӯдакӣ, Ҳисор, Шаҳринав, Ваҳдат зиёда аз 200 тонна маҳсулоти кишоварзӣ барои сокинони Вилояти мухтори кӯҳистони Бадахшон равон карда шуд.
Тавре ки аз вазорати кишоварзӣ ба АМИТ «Ховар» иттилоъ доданд, 40 тонна картошка, 50 тонна пиёз, 10 тонна сабзӣ, 9 тонна карам, 2 тонна қаламфури булғорӣ, 30 тонна тарбуз, 20 тонна харбуза, 2 тонна биринҷ, 4,5 тонна орд, 2 тонна помидор, ҳамчунин чой, равған ва дигар маҳсулоти хурокворӣ бо нархҳои то 30-50 фоиз нисбат ба бозор арзон, ба сокинони ноҳияҳои Дарвоз, Рӯшон, Рошқалъа, Ишкошим ва Мурғоб пешкаш гардид.