Марги навраси 15 сола бар асари садамаи нақлиётӣ

Душанбе, 21.08.2015. (АМИТ «Ховар»). — Тавре ки аз Вазорати корҳои дохилии мамлакат ба АМИТ «Ховар» иттилоъ доданд, рӯзи 19-уми августи соли равон ронандаи автомашинаи тамғаи “Опел-Астра” сокини 24-солаи шаҳри Кӯлоб, ҳангоми ҳаракат дар самти Восеъ-Кӯлоб бехатарии ҳаракатро таъмин карда натавониста, пиёдагардон: духтарчаи 1-сола, писарчаи 5-сола ва навраси 15-сола —  истиқоматкунандагони шаҳри Кӯлобро пахш намудааст. Навраси 15-сола, ҷароҳати вазнини ҷисмонӣ бардошта, дар роҳи интиқол ба беморхона ба ҳалокат расида, пиёдагардони хурдсол бо ҷароҳатҳои гуногуни ҷисмонӣ дар беморхона бистарӣ шуданд.
Дирӯз, ронандаи автомашинаи тамғаи “Опел-Астра”, сокини 54-солаи шаҳри Кӯлоб, ҳангоми ҳаракат дар шоҳроҳи “Душанбе-Кӯлоб-Хоруғ” аз ӯҳдаи идораи воситаи нақлиёт набаромада, дар канори рости роҳ чаппа шудааст. Дар натиҷа, мусофири автомашинаи мазкур зани 47-солаи сокини шаҳри Кӯлоб ҷароҳати вазнини ҷисмонӣ бардошта, дар беморхона фавтидааст.