Мулло Маҳмадазим безарар гардонида шуд

Душанбе, 17.08.2015 (АМИТ «Ховар».)- Кормандони Кумитаи давлатии амнияти миллӣ боз як ҳодисаи ба ҳудуди Тоҷикистон ворид шудани маводи мухаддирро пешгирӣ карданд. Тавре ки ба АМИТ «Ховар» иттилоъ дода шуд, кормандони КДАМ барои санҷиши маълумоти дастрасшуда дар бораи он ки гурӯҳи нашъаҷаллобон ният доранд аз ҳудуди Афғонистон ба навоҳии Ҳамадонӣ ва Фархори вилояти Хатлон маводи мухаддир ворид созанд, як қатор чорабиниҳоро амалӣ карданд. Дар натиҷаи роҳандозии тадбирҳои зарурӣ, ҳангоми аз назаргузаронии ҳавзи моҳидории рақами 3-юми ноҳияи Ҳамадонӣ 6 халтаи полиэтиленӣ бо 12 кг 900 гр. героин, 34 кг 50 гр. афюн ва 86 кг 500 гр. ҳашиш дарёфт ва мусодира шуд. 
Ҳангоми роҳандозии чорабинии махсуси минбаъда барои боздошт кардани нашъаҷаллобон дар ҳудуди ноҳияи Фархор, қочоқбарон ба амри иштирокдорони амалиёт, оид ба таслим шудан, итоат накарда, ба сӯйи кормандони КДАМ оташ кушоданд. Дар натиҷаи тирпарронии ҷавобӣ қочоқбари ашаддӣ, мулло Маҳмадазим валади Ҳоҷибадал безарар гардонида шуд. Дар ҷойи ҳодиса 1 автомати Калашников, 3 тирдон бо 70 дона тир,  8 кг 200 гр. афюн ва 1 кг 200 гр. бангдона дарёфт ва мусодира гардид. 
Мавриди зикр аст, ки нисбат ба ин гурӯҳи ҷиноятӣ аз тарафи кормандони мақомоти амниятӣ ҳанӯз 5-уми майи соли равон амалиёт гузаронида шуда буд. Он вақт қочоқбарон бо истифода аз торикии шаб, 146 кг. маводи мухаддирро дар ҷойи ҳодиса партофта, ба қаламрави Афғонистон фирор карда буданд.   
Ҳамчунин дар ҷараёни амалиёти дигари кормандони КДАМ дар ҳудуди яке аз минтақаҳои наздисарҳадии ноҳияи Ҳамадонӣ 1 борхалта бо 12 кг 166 гр. ҳашиш, 1 адад гулӯлапартои тамғаи «ПГ-7В» ва 2 қаиқи худсохт, ки нашъаҷаллобон барои гузаштан аз дарёи Панҷ истифода мебаранд, бозёфт ва мусодира карда шуд. 
Вобаста ба ҳодисаҳои зикршуда парвандаи ҷиноятӣ оғоз шуда, тафтишоти пешакӣ идома дорад.