Ташкили гурӯҳи пешоҳанг ба хотири таъмини амният

Душанбе, 20.08.2015 (АМИТ «Ховар», Фарзонаи Давлат).-Имрӯз дар Вазорати корҳои дохилӣ сӯҳбати озоду самимии роҳбарияти ВКД бо ҷавонони фаъоли мамлакат доир гардид. 
Ин вохӯрӣ бо ташаббуси мақомоти корҳои дохилӣ дар ҳамкорӣ бо Кумитаи ҷавонон, варзиш ва сайёҳии назди Ҳукумати Ҷумҳурии Тоҷикистон амалӣ гардида, дар он донишҷӯёну ҷавонони пешсафу лаёқатманди шаҳри Душанбе ва навоҳии тобеи ҷумҳурӣ ҷамъ омаданд.
Дар вохӯрӣ масъалаҳои ҳамкории мақомоти корҳои дохилӣ бо ҷомеа, бахусус бо ҷавонони фаъоли ҷумҳурӣ, дар самти пешгирии шомилшавии ҷавонон ба ҳар гуна ҳизбу ҳаракатҳои гуногуни хусусияти террористиву экстремистидошта, тақлид ба фарҳангҳои бегона, инчунин аз ҳисоби ҷавонон ташкил намудани гурӯҳи пешоҳанг (авангард) мавриди баррасӣ қарор гирифт.
Дар охир аз ҷониби донишҷӯёну ҷавонон якчанд таклифу пешниҳодҳои  муфид дар самти пешгирии ҷавонон аз пайвастан ба гурӯҳи бо ном «Давлати Исломӣ»-и Ироқу Шом ва тарғиби фарҳанги миллӣ ироа гардида, аз ҷониби  роҳбарият пазируфта шуд.