Туркманистон яке аз мавқеъҳои афзалиятнокро дар стратегияи сиёсати хориҷии Тоҷикистон ишғол мекунад

Душанбе, 20.08.2015. (АМИТ “Ховар”). — Ин нуқтаро имрӯз Президенти Ҷумҳурии Тоҷикистон Эмомалӣ Раҳмон зимни изҳороти матбуотӣ пас аз анҷоми мулоқоту музокироти сатҳи олӣ миёни Тоҷикистону Туркманистон дар шаҳри Ашхобод изҳор дошт.
Сарвари давлати Тоҷикистон Эмомалӣ Раҳмон таъкид намуд: «Мо дар самти тақвият ва таҳкими минбаъдаи шарикии Тоҷикистону Туркманистон ва диверсификатсияи соҳаҳо, самтҳо ва шаклҳои рушди мутақобилан судманди он манфиатдор ҳастем. Маҳз ин масоил мавриди таваҷҷуҳи баррасӣ ва гуфтушуниди мо бо Президенти Туркманистон муҳтарам Гурбонгулӣ Бердимуҳаммедов буданд, ки доираи васеи мавзуоти дуҷониба, минтақавӣ ва байналмилалиро фарогиранд».