Убайдуллоев хостори ҳимояи ҳуқуқҳои коргарон гардид

  Душанбе, 18.08.2015.(АМИТ «Ховар», Марзия Саидзода).- Раиси шаҳри Душанбе Маҳмадсаид Убайдуллоев аз Федератсияи Иттифоқҳои касабаи  ҷумҳурӣ ва Иттифоқҳои касабаи соҳавӣ даъват ба амал овард, ки санҷиши шароити кории кормандони тамоми субъектҳои  хоҷагидори пойтахтро бо ҷалби дигар ниҳодҳои масъул оғоз намоянд. Раиси шаҳр таъкид намуд, ки санҷишро пеш аз ҳама дар корхонаҳои калони шаҳр шуруъ намуда, дар ҳамкорӣ бо корфармоён барои ҳимояи ҳуқуқи коллективҳои меҳнатӣ тадбирҳои судманд андешанд. М. Убайдуллоев  масъалаи иҷрои рисолати касбӣ аз ҷониби иттифоқҳои касабаро дар самти ҳимояи ҳуқуқи кормандон ва ташкили шароити иҷтимоии корӣ дар ҷаласаи кории шаҳрдорӣ, ки бо ҳузури роҳбарони сохторҳои алоҳидаи масъули ҷумҳуриявию шаҳрӣ ва раисони Комиссияҳои доимии Маҷлиси вакилони халқи шаҳри Душанбе доир гардид, матраҳ намуд.