Вохӯрии табибон бо раиси ноҳия

Файзобод, 18.08.2015 (АМИТ «Ховар», Субҳониддини Маҳмуд).-Имрӯз бахшида ба иди касбии кормандони соҳаи тиб дар  кохи Рӯдакии ноҳияи Файзобод  вохӯрии раиси ноҳия Миралӣ Раҷабзода бо табибон ва кормандони тандурустӣ баргузор гардид. 
 Дар ин вохӯрӣ раиси ноҳия кормандони соҳаи тибро бо иди касбияшон табрику таҳният намуда зикр дошт, ки  Сарвари давлат барои беҳдошти саломатии мардум,  таъмини зиндагии шоистаи онҳо пайваста чораҳои муассир меандешад. Аз ин рӯ, рушди соҳаи тандурустӣ яке аз самтҳои афзалиятноки сиёсати давлату Ҳукумати ҷумҳурӣ буда, ҳамасола маблағгузориҳо ба ин соҳа меафзояд.  Муассисаҳои наву замонавии ҷавобгӯ  ба стандартҳои байналмилалӣ   сохта  ба истифода дода мешаванд.
 Соли равон барои рушди соҳаи тандурустии ноҳияи Файзобод аз буҷаи маҳаллӣ 6 милиону 444 ҳазору 153 сомонӣ ҷудо гардидааст, ки ин рақам нисбат ба соли 2010 беш аз се баробар зиёд аст. 
Ёдрас мешавем, ки дар ноҳия 49 муассисаи тандурустӣ  ба мардум хизмат мерасонад.